Einstakt tækifæri fyrir alla sem halda að þeir geti ekki skrifað – og alla hina líka...

Þorvaldur Þorsteinsson myndlistamaður og rithöfundur gefur okkur að þessu sinni kost á örstuttu en öflugu námskeiði í skapandi skrifum, en hann er meðal eftirsóttustu kennara á því sviði hér á landi.

Á námskeiðinu ætlar Þorvaldur að vinda ofan af amk. hluta þeirra ranghugmynda sem skólakerfið elur á varðandi skapandi skrif og kynnir til sögunnar einföld en notadrjúg verkfæri fyrir þátttakendur að nýta til eigin skráningar og sköpunar.

Þorvaldur minnir á að sagnaandi hvers manns býr yfir mikilvægum lækningamætti og getur umbreytt neikvæðri orku og ótta í uppbyggilegan styrk. Þess vegna skiptir miklu að við skerpum meðvitund okkar um eigin sagnaheim og kynnumst því hve aðgengilegur hann í raun er.